首先我得聲明, 我對韓國SKINCARE的產品追蹤已接近乎零, 也不太認識韓國SKINCARE之動向. 皆因近2年我用親都出事, 會敏感會出油脂粒會爆瘡. 而且由於我唔識韓文, 成份是什麼我完全無得掌握, 此仍令我覺得無乜安全感. 你問我係唔係識得晒所有成份咩? 當然唔係, 但起碼我會知道有多少種防腐劑, 用唔用會係個人決定. 當然好多人都話韓國貨好用, 呢個我唔會反對, 因為唔同年紀有唔同需要, 最緊要自己感覺良好.
本來我已好多年無買韓國SKINCARE, 因為我同佢地做唔到朋友. 但見doctorcos來勢好勁咁, 舖天蓋地MARKETING說是爆水神器, 站在女人的那種花心同埋唔買好蝕底的心理, 都係舊年年尾買左一瓶來試.
呢篇分享文都HEA左好耐先落筆, 因為唔知點寫. 手上資料好有限, 只可分享用後感.
呢瓶MASK, 我估早於3年前有客問我可唔可以幫手買, 因為佢係美容院買好貴. 我問佢幾多錢, 佢話要HK980. 當年韓國野未係咁普遍, 而我就覺得980蚊的確是太貴, 當然沒有入貨, 我只叫去返美容院買.
現在平到團購$150以下一瓶, 雖然我唔知配方有無改, 但由於太多人話比我聽有假貨, 我都會叫人去一D可靠有商譽的店去買.
呢篇文之前在FACEBOOK預告之後, 有FANS通知我這瓶和她們買到的不同. 有D FANS話 我個盒無左LOGO, 又見到我同佢地果瓶唔同, 我果瓶好CREAM狀. 我上網去CHECK, 其實都有我呢款,係唔係最新我就唔敢講.
比FANS講一講我都怯一怯, 好猶豫寫唔寫好, 又唔通老貓燒鬚買了假貨?? 但我係一個好大型的美容公司買, 我相信佢地唔會賣假貨. 可能只係唔同代.
坊間太多說法, 我都唔知跟邊個先啱. 有人話我呢瓶係第一代, 也有人話係第2代. 固勿論如何, 我就根據我手上這瓶去分享, 反正我相信我唔會再買多一瓶.
全韓文當然唔明.
值得一提的是, 我見過唔同ml的份量, 我這瓶是100g, 之前見過110g, 150g. 所以就係好似許冠傑首歌咁.."難分真與假"
英文說明也是等於無說明, 因為也是沒有成份.
我見Groupon 或拍賣場說這個mask 是7合1功能 (眼部護理, 多重鎖水, 睡眠保濕, 收細毛孔, 緊緻提升, 貯存營養, 舒緩鎮靜)
我這瓶搽上手的感覺真係好似豬油膏, 微香. 感覺就算BLEND開左都係好似油油地.
雖然我唔鐘意果種好油的感覺, 我都敷了8,9次. 對於我呢個年紀, 我唔覺得好神. 我唔喜歡那種洗完面過完水, 你都仲覺得油, 由於用手搓面, 手也是油油的, 水珠可以一滴滴在手心上.
但發現了一個奇怪現象, 就係由於我覺得太油, 我用來搽手搽腳. 如果呢個用法, 又一D都唔油, 搽左好似無搽. 這的確令我百思不得其解. 非常R頭.
最後, 我將佢過戶左比我母后, 佢反而覺得OK. 所以呢, 有時真係人夾人緣...証明我真係同韓仔無緣. 印象中我喜歡又OK的牌子, 只有IOPE同NATURE REPUBLIC.
以上純個人意見, 不過大家可以試用揀返啱自己皮膚和感覺的一代去買無妨, 都係果句, 最緊要啱自己用.
