大叢海鮮火鍋 - 不得不讚

我在山林道工作都快2年了, 要不是朋友帶我來, 我真不知有這一間店.

上次是有大班朋友訂了6圍, 人多自然可以叫更多食物選擇. 之後我都有和家人再去, 人少也可以食例牌的. 不要期望有豪華裝修, 像一些地道的飯店一樣.


事實上, 我只注重食物質數. 首先來的是冰鎮鮑魚. 上檯時已非常震撼, 因為好大隻, 好厚身. 和在街市見到的是蚊脾同牛脾, 感覺上似食緊鮑魚扒, 超有口感! 味道是帶有酒味, 又爽又彈, 無得頂. 在這晚飯之後2個星期, 我去了另一間食肆食冰鎮鮑魚, 唔好味不特止, 仲要細2/3, 但價錢一樣. 立即後悔不已.

後來我同老板駿哥傾起, 才知這個鮑魚只需要$50, 大呼抵到爛, 真係大過隻湯匙架~ 而且我相信, 如果唔係同海鮮檔相熟, 係唔會可以拎到咁大SIZE的貨, 所以這是我的心水推介, 必食!!


大班人那次是訂了燉湯, 虫草花螺頭花膠豬展, 湯渣陣容都唔講得笑, D花膠多到呢…..我這湯精飲了3碗.

 

 

之後同家人去飲羅漢果菜干豬肺, 甘甜. 也是3碗, 寧願唔食飯.

這個芝麻雞好味到呢, 唔食皮的我, 都忍唔住咬了一小口. 皮脆(吊起風乾得耐夠乾身), 肉嫩JUICY, 全家人讚不絕口.

沙巴龍躉, OK~

 

 

本來脆皮炸子雞都已好味, 但一拍埋芝麻雞就遜色了. 2揀1的話, 芝麻雞勝.

這個如洗面盤大的紅酒牛尾也是不可錯過, 人少可以叫例牌, 配法包食. 不過奶奶話佢LIKE我煮的紅酒牛尾多D (弦外之音應該係叫我快D煮餐比佢食, OK無問題, 最緊要老人家開心)

 

粉絲蝦煲好味, 老公同仔都鐘意, 但我覺得如果加D辣或配白胡椒更正, 現在是平淡了一點.

如果人多, 其實可以自己點餸, 或比BUDGET比駿哥寫. 上次我地6圍, 每人除起是$270/位. 我自己覺得抵呀 ! 聽我老公講, 好似無加一(因為唔係我埋單), 所以一定有下次!


地址大家可以上飲食網搜尋一下啦~ 去開記得來探下我先啦~