** 屯門搵食 - 用心好吃的金龍泉**

母后早於2星期前話要我們入屯門食飯, 話呢個地方係我老弟舉腳推薦的, 已介紹好多同事去食, 所以我們一定要去試, 母后說今晚是吃海鮮餐.


去到才知是一間茶餐廳, 我還以為是酒家酒樓. 我呢D為食精, 當然一點都不介意, 最緊要有好野食. 由於母后和老板熟, 我們是訂了一個10人套餐的半份加1位, 仲要"略為" 更改人家的餐牌..>_<.

本來沒有什麼期望, 但第一個湯已叫我驚訝, 但忘記拍照, 是魚肚海鮮, 我可以告訴你比很多酒樓酒店都高水準.

因為之前一晚我去了W HOTEL的中菜廳"星宴"食飯, 星宴都算係出名啦, 但真係超級把鬼又唔好食又貴. 我真係未試過去酒店食可以咁差. 尤其他們的蛋白杏仁茶, 賣相超似嘔吐物, 睇見都唔開胃!!

好了, 頭啖湯咁好味, 開始有D期望了.  來了豉油王大蝦, 蝦好彈牙味道好好但我略嫌太多汁. 如果乾身D少D汁更好.

 

原本的套餐是石斑, 母后加錢改了龍躉兩味. 炒球不錯魚新鮮. 我好SURPRISE佢地加埋白果去炒之餘, 連伴碟都有PRESENTATION架, 好感動!! 如果係酒店我EXPECT呢個係必須, 但大佬呀, 我地係茶餐廳食緊呀, 呢D誠意已加晒分!!! 我同老公講, 我有理由相信個大廚係酒店出黎的!

 

 

燒味拼盆好食過星宴好多好多, 原來佢地自己有工場.

呢個小炒王又係好正, 送酒一流火候又夠, 有炸小魚, 尤魚鬚, 九菜花, 菜甫絲, 少少辣, 食到停唔到口.

 

 

 

豉汁聖子, 新鮮!!

 

 

 

蒜蓉粉絲蒸帶子, 呢6隻就算自己係街市買都百幾蚊無得走雞, 好大隻!

 



 

本來已好飽, 但這個乳鴿, 真係好食過沙田龍華好多, JUICY又嫩, 唔係翻炸, 水準之作.

 

 

 

本來跟餐有個炒E麵, 但因為無晒麵, 幫我地改泡飯. 我已話我食唔落啦, 泡飯又拎唔到走, 不如唔好要啦. 母后話唔好啦, 呢個鴛鴦米泡飯一定要食架.........好在, 聽阿媽話!!!!

 

一拎出黎已經唔得了, 湯底雪白, 之後老板放了一碟炸香的米飯焦去熱湯, "炸"一聲, 出煙!!

 

 

 

 

湯底甜到不得了, 有好多鮮魚塊, 彈牙大蝦, 勝瓜, 我話飽話飽又食左2碗 (今次大鑊了, 食大左咁多!!!)  由於湯凍了少少之後, 湯面起了一層膠質, 所以都幾肯定是魚湯底.

 

 

 

好了. 講左咁耐. 大家一定好想知係邊度同食左幾多錢. 套褻原本$1488/10人用. 沒加一沒茶芥. 但由於我地加左人頭又改左MENU (正常唔可以改架), 最後我地埋單係$870. 我老公找完數, 出了門口, 我問幾錢, 發現好似計少左(因為有叫了其他野), 即返轉頭問老板有無收少錢, 有的話我地比返. 老板笑笑口話無呀.啱架啦.

 

 

呢D套餐要預訂, 佢地有樓上大房可以包房食的.  人多去都OK架. 老板好好人, 成日笑笑口的.

 

 

我唔識老板, 都係第一次見佢. 但我完全覺得佢好用心經營, 小店生意難做, 街坊生意而已, 只希望支持下佢, 亦介紹比大家食好野. 而家去SPAGHETTI HOUSE唔知食左乜都2舊水一位, 呢度,我夠膽講, 我比$200去食, 我都覺得自己有賺, 我抵晒!!

 

 

地址 : 屯門鄉事會路28-38號冠興樓地下 (即V CITY 對面) ( TEL : 2865 9628)