* 真金白銀系列* - Hitachi Hada Crie Cool CM-N1000使用小分享

 

我真係好慢、慢到全世界都買埋Hada Crie 我等日元跌，才叫朋友幫我買. 其實之前都想買, 但見太多網上評語(專業的) 清一色都讚到天上有地下無，我反而怕中伏。家中大把美容小儀器，我都係睇定D先，反正我從不是領先的一群, 而且我是以用家的身份去分享。日元參巧價由11500-13800日元不等, 睇你你去的地方有無做特價.


 
係無做research情況下，我買了Hada Crie Cool, 比之前一代多了cool(收毛孔的功能).



 
由於我是在日本買，和香港電壓不 同，所以要配一個火牛轉壓(在香港電器舖/電腦商場有售, CHEAP的約$45, 好DDhttp://blog.yahoo.com/y/blog/post?articleId=1168552#的$60-70, 買個好D啦~ )。相比於上一代HADA CRIE, 由於這一代有冷凍功能, 所以用電都會多D 而沒有了可充電的方便, 這個必須插住線火牛用.

 

 

機身簡介 (見下圖) :

入/切  = 開關掣
強/弱  = 震動強弱度調教

1.清潔
2.提升
3.補濕
4.冷卻收毛孔

這部機90秒沒有操作的話會自動關機模式

 

操作時需要緊握機身兩旁金屬位置, 如在操作中放下多於30秒(可能是要補加化妝水的話), 也是會自動關機的.

 






Hada Crie Cool 集合4個Steps的功能，共需做18分鐘：

1.清潔（5分鐘）
2.提升 （5分鐘）
3.補濕 （5分鐘）
4.冷卻收毛孔 （3分鐘）

用這個機，我覺得選對配合使用的產品都很重要。以下是我看了些資料再加上分析後的個人的分享。
 

先卸好妝並清潔好面部，然後：

** Step 1 - 導出清潔 **

將棉花套上機頭後，將去角質的 卸膚水／化妝水弄濕棉花，在面上由內到外推出,機頭是會震動的 。

本來我用森田的化妝棉，但因size略細不夠理想，好容易甩出黎，所以我用返美的。有人反映用美的棉花會爛，其實只要你塊面和棉花都夠濕潤，是不會磨爛棉花的，所以不要慳卸水／去角質水。

有人用Bioderma, 我覺得應該ok. 但也有朋友用開BIODERMA卸膚無事, 但一加埋用呢個機就出粒粒, 我相信可能因為配合了導出而令污糟野浮出黎. 想唔想面對現實就睇你自己了. 

我做這個STEP, 也是用泉發的玫瑰淡斑卸妝水/永久喚膚卸妝水,  我自己用了幾次, 都唔覺棉花好黑, 可能係因為呢個星期腳傷無返工無化妝. 習慣我做完呢個STEP都會用水過一過先做下一個STEP, 因為感覺導出後有污垢, 沖一沖水好D.

** Step 2 - 補濕提升 **

這步驟不用套上棉花, 直接用有保濕成份的化妝水弄濕面部，由面中心向外移動，向上提升的動作, 機頭是會震動的。

由於Step 2是用+／- 極，所以不算是導入，只算是令化妝水的保濕成份浸透皮膚好一點。


係呢個STEP, 我用了SASSOU的天女滴. 感覺也很OK.

** Step 3 - 導入補濕 **

這步驟需要套上棉花在機頭，同樣將棉花套上機頭後，將化妝水弄濕棉花，在面中央由內到外推出。這步驟機頭是會震動的.

由於Step 3是用負極電位，所以會幫助將營養深層導入皮膚。

這個步驟我用了泉發的檀香化妝水/ 泉發初乳玫瑰化妝水. 用完感覺皮膚是超軟滑, 而且香味怡人, 就好似香薰治療的效果, 不只在面上的, 也在嗅覺上的安慰.


 

** Step 4 冷卻效果（收毛孔) **

 

這個step 是什麼都不需要，不用棉花，不用化妝水，直接讓冷風接觸面部毛孔，達到細緻效果。

頭90秒是會輕微震動, 之後的90秒是靜止狀態純冷凍感.完成後會自動關機.


手勢大致如下圖, 由面的中心向外推, 順著肌理. 鼻的位置就由下向上, 也可以做埋頸位, 也是由下向上.

** 用後感與迷思分享  **

- 切記每一下都慢慢做, 唔好太快或大力拉, 要FEEL到機頭的震動.

- 用了3天, 已覺得皮膚有返D光澤. 其實我覺得, 不論用什麼機或什麼MASK, 如果你肯勤力, 連續一星期日日花20分鐘去保養, 根本做乜都會令你靚左, 齋敷MASK都會靚. 世上只有懶女人, 沒有醜女人!!

- 有客人問我, 係唔係要日日用呢部機. 我唔會話一定要日日用, 你想靚D就勤力D啦, 由於我覺得要用3次卸妝水/化妝水都幾煩 (重復用同樣的化妝水又總覺得唔對路), 而且平時我已用卸妝水卸妝, 迷思就係, 如果我日日用的話, 咁我每日要用2次卸妝水, 會唔會OVER CLEANSE呢??? 所以我自己會在開始一星期時真係日日用, 之後會隔日用.

- 另外由於我用的化妝水都是比較滋潤, 我自己又係妹仔命, 太補又唔得. 以前試過學人地連續7日敷MASK, 人地就白白淨靚靚, 我就爆晒粒粒 (但係我都係用同樣的MASK先激死). 所以並沒有一本天書. 唔係話適合人地就一定適合自己, 要根據自己的皮膚性質去設計一套.

- 再有另一個迷思係..我睇左好耐, 也問日文朋友STEP 2 同 STEP 3 其實有乜分別. 日文朋友根據說明, 話係用多左棉花但係都係補濕. 咁我根據本人理性分析, 我覺得, 如果時間多, 可以STEP 2 和 STEP 3 都做. 如果懶D, 可以只用STEP 3. 而我如果唔做STEP 2, 主要係因為太滋潤出粒粒而唔係懶. 

- STEP 3 另一個一石二烏的懶女人方法係.....我會敷住MASK來做 , 咁樣又有D變化了 !! MASK 揀D 精華比較多D, 要用紙MASK, 不用類真皮面膜, 因為導入不到. 呢個時候我家中的大量MASK就有用武之地了!!!   本來STEP 3要用棉花的, 就改為不用, 直接用部機在面上碌, 咁就可以又全面敷MASK又導入, VERY NICE!!! 


- 個人的平靚正又多精華MASK推介, 係潤之戀同BODY LABO的MASK, 仲要等"屈人寺", "慢零"做PROMOTION入貨, 抵用. 

- Step 4 的冷卻功能其實我好LIKE, 因為涼浸浸好爽, 而且我亦會每次做完ILCSI的SOUR CHERRY MASK後, (主要收毛孔之用), 再用STEP 4去冷多鼻翼兩旁的毛孔2次STEP 4, 效果更正!!  (舊文分享 : http://blog.yahoo.com/happycdou/articles/585426/category/ilcsi+%E5%8C%88%E7%89%99%E5%88%A9%E6%9C%89%E6%A9%9F%E5%A4%A9%E7%84%B6%E8%AD%B7%E8%86%9A%E5%93%81%E5%88%86%E4%BA%AB )


- 總括來講, 我覺得呢部機以咁O既價錢算係好全面的功能. 好多朋友覺得可能日日要用18分鐘一想起都煩, 其實可以打散來做, 唔好令自己覺得係壓力咁會更有MOTIVATION. 想導出就導出, 再係咁意做下導入. 又或者做完MASK又冷凍收下毛孔, 只要令自己開心無壓力才會有推動力~

** 謝謝收看! **

請按以下ICON "LIKE"我的FACEBOOK FANS PAGE "C-DOU", 可得到第一時間美容, 健康, 時裝的UPDATE ~